روس کا ہائپرسونک بین البراعظمی میزائل کا کامیاب تجربہ

روس نے دنیا کے جدید ترین بلیسٹک میزائل کے تجربے کا دعویٰ کیا ہے جو ایک براعظم سے دوسرے برِاعظم تک آواز سے پانچ گنا رفتار سے مار کرسکتا ہے۔ وزارت دفاع کا کہنا ہے کہ یہ ایک طرح کا ہائپر سونک (صوتی رفتار سے تیز) گلائیڈر ’’ایون گارڈ‘‘ منصوبے کا حصہ ہے، جو گلائیڈر کے ذریعے آئی سی بی ایم یعنی بین البراعظمی بیلسٹک میزائل کو آواز سے پانچ گنا زائد رفتار دیتا ہے، اسے مغربی قازقستان کے علاقے اورنبرگ سے لانچ کیا گیا جس نے ہزاروں میل دور کم چاٹکا ٹیسٹ رینج میں اپنے ہدف کو کامیابی سے نشانہ بنایا۔ ایک جانب تو یہ ایٹمی ہتھیار لے جاسکتا ہے تو دوسری جانب دنیا کے جدید ترین اینٹی میزائل (میزائل شکن) ڈیفنس سسٹم کو ناکارہ بناسکتا ہے۔ صدر پیوٹن کے حکم پر اس کے تجربات کئے گئے اور شاید اگلے برس یہ میزائل روسی اسلحہ خانے کا حصہ بھی بن جائے گا۔ تجزیہ کاروں کے مطابق روس نظری طور پر دیگر طاقتور ممالک پر اپنی دھاک بٹھانا چاہتا ہے اور یہ تجربہ اسی سلسلے کی ایک کڑی ہے۔ دوسری جانب مغربی تجزیہ کاروں نے کہا ہے کہ روس اپنی دفاعی صلاحیت کے متعلق جو دعوے کرتا ہے وہ اس کی اصل صلاحیت سے زیادہ ہوتے ہیں۔ روسی صدر ولادیمیر پیوٹن نے کہا کہ روس کے پاس اب جدید ترین اسٹرٹیجک ہتھیار ہے جو کئی دہائیوں تک روس کی سلامتی کا ضامن ہوگا۔ جدید ترین ہائپر سونک نیوکلیئر میزائل کا تجربہ روسی صدر ولادی میر پیوٹن نے بھی دیکھا کہ ایون گرڈ، میزائل سسٹم کے کامیاب تجربے کو روسی صدر نے نہ صرف روس بلکہ پوری دنیا کے لئے اہم قرار دیا۔ انہوں نے کہا کہ روس کے پاس اب اسٹرٹیجک ہتھیاروں کی نئی قسم ہے جو کئی دہائیوں تک روس اور روسی عوام کے تحفظ کی ضامن ہے۔