کشمیر اور ہماری بے حسی۔۔

آزادی کی تحریکیں زیادہ عرصہ برقرار نہیں رہتیں، یہ رفتہ رفتہ ضعف کا شکار ہوجاتی ہیں یا مقصد حاصل کرکے تحلیل ہوجاتی ہیں۔ معاصر دنیا میں یہ کہنا تاریخی طور پر درست ہوگا، تاہم کشمیر کی تحریکِ آزادی دنیا کے دیگر خطوں میں جاری تحریکوں سے قدرے مختلف ہے۔ جدید تاریخِ کشمیر میں آزادی کی تحریک 1931ء میں اس وقت شروع ہوئی، جب مسلمانانِ کشمیر نے ڈوگرہ راج کی مطلق العنانیت کے خلاف علمِ بغاوت بلند کردیا تھا۔ کشمیریوں نے ابتداً ڈوگرہ حکمرانوں کے مظالم سے نجات کے لئے آزادی کی تحریک شروع کی تھی، بعدازاں 1947ء میں جب ہندوستان تقسیم ہوا اور یہاں کی شاہی ریاستوں کو برطانوی ہند کے سقوط کے بعد اس کی جانشین حکومتوں (انڈیا/پاکستان) کے ساتھ سیاسی بندوبست کے لئے ازسرنو معاہدوں کی ضرورت پیش آئی، تو یہ امید کی جارہی تھی کہ مہاراجہ کشمیر اپنی رعایا کی خواہش کو مدنظر رکھتے ہوئے پاکستان کے ساتھ الحاق کریں گے لیکن بدقسمتی سے ایسا نہیں ہوسکا۔ اس موقع پر کشمیر کی تحریکِ آزادی میں ایک نیا موڑ آیا۔ کشمیریوں نے ڈوگرہ حکمرانوں سے کامل آزادی کی تحریک شروع کی اور ان کا مطمح نظر الحاقِ پاکستان ٹھہرا۔
تقسیمِ ہند کے بعد اس تحریک پر پون صدی کا عرصہ بیت گیا، کشمیر کی تحریک آزادی سے جن نامور کشمیری شخصیات کو پہچان ملی، ان میں سے شیخ عبداللہ اور چوہدری غلام عباس کا دور ہم نے کتابوں میں پڑھا اور بزرگوں سے سنا، سید علی گیلانی کا دور ہم نے ازخود پایا اور مشاہدہ کیا، اب یہ تحریک تیسری نسل کو منتقل ہوچکی ہے، کسی بھی تحریک کے لئے اس قدر طویل دورانیہ معمولی نہیں ہوتا، طویل عرصہ تک جاری رہنے والی تحریکیں اپنا اثر کھو دیتی ہیں، تاہم کشمیر کی تحریک آزادی میں برہان مظفر وانی جیسے نوجوان آج بھی قربانیاں پیش کررہے ہیں، اگر ایک جانب اس بات پر دکھ ہوتا ہے کہ کشمیریوں نے وسیع پیمانے پر قربانیاں دینے کے باجود آزادی کی صبح نہیں دیکھی تو دوسری جانب اس بات پر حوصلہ بھی ملتا ہے کہ ایک ایٹمی قوت وسیع پیمانے پر انسانیت سوز مظالم کے باوجود کشمیریوں کی تحریک آزادی کو کچلنے میں ناکام ہوئی ہے۔ کشمیر کی آزادی کی راہ میں دو بڑی رکاوٹیں حائل ہیں، اول انڈیا کی ہٹ دھرمی اور دوم عالمی برادری کی بے حسی۔ 1948ء میں جب مسئلہ کشمیر سلامتی کونسل میں پیش کیا گیا تو اس تنازعے نے عالمی توجہ حاصل کی، اس طرح بڑی طاقتوں نے بھی اس مسئلے میں دلچسپی لی اور اپنے مفادات کی خاطر پاکستان و انڈیا کی حلیف بنیں۔ 1948-49ء میں اقوام متحدہ کمیشن برائے ہند و پاکستان کی منظور کردہ تفصیلی قراردادوں کی روشنی میں یہ طے پایا تھا کہ جموں و کشمیر کے سیاسی مستقبل کا فیصلہ مقامی ریاستی باشندے کریں گے۔ کشمیریوں کے لئے حقِ خودارادیت تسلیم کرلیا گیا، لیکن ان کو یہ حق تاحال نہیں دیا گیا، اس راہ میں ہمیشہ رکاوٹیں کھڑی کی گئیں، دراصل انڈیا چاہتا ہی نہیں ہے کہ کشمیری باشندے آزادانہ رائے شماری کے ذریعے الحاق کا فیصلہ کرے، انڈیا کے نزدیک اس کا مطلب جموں و کشمیر سے دستبردار ہونا ہے کیونکہ کشمیریوں کی اکثریت انڈیا سے الحاق کی خواہشمند نہیں ہے، اگر انڈیا کو ذرا بھی امید ہوتی تو وہ رائے شماری کی راہ میں رکاوٹوں کے بجائے اس کے انعقاد کی راہ ہموار کرتا۔ انڈیا نے سلامتی کونسل کی قراردادوں سے روگردانی کرنے اور مقبوضہ جموں و کشمیر پر اپنا قبضہ مستحکم کرنے کے لئے دو طریقے اختیار کیے ہیں، اول عالمی برادری بشمول سلامتی کونسل کو مسئلہ کشمیر پر کسی قسم کے کردار سے باز رکھا جائے، دوم مقبوضہ جموں کشمیر میں اپنے پاؤں جمانے کے لئے حریت پسندوں پر بدترین تشدد کی پالیسی اختیار کی جائے، جہاں تک تشدد کی بات ہے 2014ء میں نریندر مودی کا وزیراعظم بننے کے بعد بھارتیہ جتنا پارٹی (بی جی پی) کے دورِحکومت میں انڈیا نے اس پالیسی پر جس طرح عمل کیا ہے اس کی نظیر گزشتہ دہائیوں میں نہیں ملتی، اس وقت کشمیری حریت لیڈر شپ جیلوں میں بند ہے، ان پر مختلف سیاسی مقدمات بنائے گئے ہیں، انڈیا چاہتا ہے کہ حریت پسند قیادت کسی صورت جیل سے باہر نہ آئے، گزشتہ دو برسوں کے دوران تین حریت پسند رہنما سید علی گیلانی، محمد اشرف صحرائی اور الطاف احمد شاہ دوران حراست انتقال کرگئے جبکہ شبیر احمد شاہ، محمد یاسین ملک، مسرت عالم بٹ اور آسیہ اندرابی سمیت متعدد رہنما خرابی صحت کے باوجود دہلی کی تہاڑ جیل میں قید وبند کی صعوبتیں جھیل رہے ہیں۔ انڈیا نے نہ صرف حریت پسند رہنماؤں کو بند رکھا ہے بلکہ ایسے ہزاروں نوجوان بھی جو حق خودارادیت کی بات کرتے ہیں، جیلوں اور تفتیشی مراکز میں زیرحراست ہیں یا لاپتہ کردیئے گئے ہیں، مقبوضہ جموں و کشمیر میں خوف کا یہ عالم ہے کہ کوئی شخص کشمیر کی تحریک آزادی کے حوالے سے تبادلہ خیال بھی نہیں کرسکتا۔ 2020ء میں جب راقم کشمیر کی سیاسی تحریکوں پر تحقیق کے لئے مواد جمع کررہا تھا تو درکار معلومات کے لئے مقبوضہ کشمیر کے ایک صحافی سے سوشل میڈیا کے ذریعے رابطہ قائم کیا، وہ راقم کے کسی بھی سوال کا جواب دینے سے قاصر تھا اور ان کا ایک ہی مطالبہ تھا کہ آپ انٹرنیٹ کے سہارے یہ تمام معلومات تلاش کرلیں۔ آپ کو اندازہ نہیں کہ ہم کس قدر سخت پہرے میں ہیں، ہماری ہر بات نوٹ کی جارہی ہے اور مسلسل نگرانی ہورہی ہے۔ گزشتہ سال برطانوی نشریاتی ادارے بی بی سی اردو کی سیربین میں ایک رپورٹ پیش کی گئی تھی، جس میں بعض کشمیریوں کی شناخت ظاہر کیے بغیر ان کے ساتھ کشمیر میں امن کے حوالے سے بات کی گئی تھی، کشمیری مرد وخواتین نے جو تاثرات بیان کئے، وہ اگست 2019ء کے بعد کشمیر کا منظرنامہ سمجھنے کے لئے کافی ہیں، ایک خاتون کا کہنا تھا: ”انڈین حکومت اب مختلف طریقوں سے آوازوں کو دبا رہی ہے، پہلے ایسا ہوتا تھا کہ احتجاج ہوں گے اور یہ تصور تھا کہ تشدد ہوگا، بندوقیں ہوں گی، راستوں پر جھڑپیں ہوں گی لیکن اب سب کچھ بدل گیا ہے“۔ ایک اور خاتون کا کہنا تھا: ”لوگوں کا دم گھٹ رہا ہے، کوئی لکھے تو وہ گرفتار ہوجاتا ہے، صرف کشمیر کے باہر نہیں بلکہ کشمیر کے اندر بھی کوئی خبر نہیں، ہم جو سانس لیتے ہیں اس تک میں خوف ہے“۔ ایک نوجوان کشمیری نے بتایا: ”صرف کشمیری ہی نہیں، مجھے لگتا ہے انڈیا بھی اس خاموشی پر الجھن میں ہے، پتا نہیں کشمیریوں کی خاموشی کے پیچھے مجموعی سمجھ داری ہے یا پھر ناامیدی“۔ ان حالات میں اگر انڈیا یہ بیان دے کہ مقبوضہ جموں و کشمیر میں خاموشی کے پیچھے ”امن“ ہے تو اس کو ہٹ دھرمی اور بے شرمی کا نام نہ دیا جائے تو اور کیا کہا جائے؟