حواس کھل کے ٹٹولے بڑے سوال کئے
جنابِ عشق نے کیسے کڑے سوال کئے
یہ حکم تھا کہ سراسر خموش رہنا ہے
مگر فقیر تھے ضد پر اڑے، سوال کئے
مجھے جنون تھا ہر چیز جان لینے کا
سو میری عقل پہ پردے پڑے، سوال کئے
یہ دل اداس فلک کی طرح پڑا ہوا تھا
سو میں نے اس میں ستارے جڑے، سوال کئے
تمام رات نسوں میں لپکتے سناٹے
مرے حواس سے کھل کر لڑے، سوال کئے
اک التفات کا زر تھا ہمارے پیش نظر
سو خود سے جھوٹے مسائل گھڑے، سوال کئے
عبدالرحمن واصف
