افغانستان میں چھوڑا گیا امریکی اسلحہ دہشتگردی کا باعث

ء 2021 میں امریکی فوج کا افغانستان سے انخلا پورے خطے کیلئے ایک نیا چیلنج بن کر سامنے آیا، امریکی فوج کا افغانستان میں رہ جانے والا تقریباً 7 بلین ڈالر سے زائد مالیت اسلحہ افغان طالبان خطے میں دہشتگردی کے لئے استعمال کررہے ہیں، طالبان حکومت آئے روز عالمی امداد نہ ملنے کا واویلا مچاتی ہے جبکہ حقیقت اس کے بالکل برعکس ہے، امریکا نے افغانستان کو 11 ملین ڈالر کی امداد دی ہے، بین الاقوامی میڈیا کی رپورٹس میں انکشاف
زاویہئ نگاہ رپورٹ
امریکی فوج کا افغانستان سے 2021ء میں انخلا پورے خطے کے لئے ایک نیا چیلنج بن کر سامنے آیا ہے۔ بین الاقوامی میڈیا رپورٹس کے مطابق امریکی فوج کا افغانستان میں رہ جانے والا تقریباً 7 بلین ڈالر سے زائد مالیت اسلحہ افغان طالبان خطے میں دہشت گردی کے لئے استعمال کررہے ہیں۔ رپورٹ میں کہا گیا ہے کہ طالبان حکومت آئے روز عالمی امداد نہ ملنے کا واویلا مچاتی ہے جبکہ حقیقت اس کے بالکل برعکس ہے۔ امریکا نے افغانستان کو 11 ملین ڈالر کی امداد دی ہے۔ سائیگر رپورٹ کی مطابق امریکا افغانستان کے لئے سب سے بڑا بین الاقوامی امداد فراہم کرنے والا ملک بن گیا ہے۔ اسی طرح اگست 2021ء میں اقوام متحدہ نے افغانستان کو بین الاقوامی سرکاری اور غیرسرکاری تنظیموں کے ذریعے 2.6 بلین ڈالر کی امداد دی۔ رپورٹ میں انکشاف کیا گیا ہے کہ اقوام متحدہ کے فنڈز کا طالبان حکومت نے ناجائز استعمال کیا۔ ایک سرکاری رپورٹ کے مطابق بین الاقوامی تنظیموں کی جانب سے افغانستان کو دیئے جانے والے فنڈز کا 50 فیصد حصہ خودکش بمباروں کے خاندانوں کو جاتا ہے۔ اسی طرح اقوام متحدہ کے فنڈز طالبان حکومت کے زیرکنٹرول مرکزی بینک میں جاتے ہیں جن سے براہ راست حقانی نیٹ ورک اور القاعدہ جیسی دہشت گردی تنظیمیں فائدہ اٹھاتی ہیں۔ رپورٹ کے مطابق جوبائیڈن انتظامیہ 43 سے 88 ملین ڈالر کے فنڈز بھیجتی رہی ہے جبکہ اقوام متحدہ نے افغانستان کو اب تک تقریباً 20.71 بلین ڈالر سے زیادہ کی امداد فراہم کی۔ ایک امریکی تجزیہ کار کا کہنا ہے کہ اقوام متحدہ سے جانے والی انسانی امداد دہشت گردی کے لئے استعمال ہورہی ہے۔ اسی طرح پاکستان میں حالیہ دہشت گردی کی لہر میں افغانستان سے لائے جانے والا غیرملکی اسلحہ استعمال ہورہا ہے۔