پاکستان اور ایران مشرق وسطیٰ میں کشیدگی کے خاتمے سمیت مذاکرات کی ضرورت پر زور دیتے ہیں، وزیرخارجہ
زاویہئ نگاہ رپورٹ
پاکستان اور ایران نے سرحدی امور سمیت دہشت گردی کے چیلنجز سے مل کر نمٹنے پر اتفاق کیا ہے۔ وزیرخارجہ اور نائب وزیراعظم اسحاق ڈار اور ایرانی وزیرخارجہ عباس عراقچی نے مشترکہ پریس کانفرنس کرتے ہوئے کہا ہے کہ اسرائیلی جارحیت رکوانے کے لئے اجتماعی کاوشیں ناگزیر ہیں۔ ایرانی وزیرخارجہ عباس عراقچی نے وزیراعظم شہباز شریف سے بھی ملاقات کی، وزیراعظم شہبازشریف نے ایران پر اسرائیل کے حملے کی شدید مذمت کرتے ہوئے ایران کی خودمختاری اور علاقائی سالمیت کی حمایت کا اعادہ کیا۔ ایرانی وزیرخارجہ عباس عراقچی کے ساتھ مشترکہ پریس کانفرنس کرتے ہوئے وزیرخارجہ اور نائب وزیراعظم اسحاق ڈار نے کہا کہ ایرانی وزیرخارجہ کو پاکستان میں خوش آمدید کہتے ہیں۔ غزہ میں اسرائیل کی جانب سے عالمی قوانین کی سنگین خلاف ورزیاں کی جا رہی ہیں۔ مشرق وسطیٰ میں اسرائیلی جارحیت کی شدید مذمت کرتے ہیں۔ انہوں نے کہا کہ ایرانی وزیرخارجہ سے خطے کی صورتِ حال کے حوالے سے گفتگو ہوئی ہے۔ ہماری بات چیت میں عالمی برادری سے غزہ میں فوری جنگ بندی کا مطالبہ کیا گیا ہے۔ اسحاق ڈار کا کہنا تھا کہ اسرائیلی حملے ایران کی خودمختاری کی سنگین خلاف ورزی ہیں۔ دونوں وزرائے خارجہ کی ملاقات میں سرحدی امور اور مشترکہ چیلنجز سے نمٹنے پر اتفاق کیا گیا۔ انہوں نے کہا کہ دہشت گردی کے ذریعے خودارادیت کو ختم نہیں کیا جا سکتا۔ مسئلہ کشمیر کو پُرامن انداز میں حل کرنے کی ضرورت ہے۔ وزیرخارجہ نے مزید کہا کہ پاکستان اور ایران مشرق وسطیٰ میں کشیدگی کے خاتمے سمیت مذاکرات کی ضرورت پر زور دیتے ہیں۔ اسرائیلی کارروائیاں عالمی و انسانی حقوق کی بھی کھلی خلاف ورزی ہیں۔ مشترکہ پریس کانفرنس کرتے ہوئے ایرانی وزیرخارجہ نے کہا کہ دہشت گردی پاکستان اور ایران دونوں ملکوں کے لئے مشترکہ چیلنج ہے۔ ایرانی وزیرخارجہ عباس عراقچی نے کہا کہ پاکستان کا مسئلہ فلسطین پر واضح اور دوٹوک مؤقف ہے، اقوام عالم فلسطین میں جاری نسل کشی رکوانے میں ناکام رہیں۔ انہوں نے کہا کہ خطے میں اسرائیلی جارحیت رکوانے کے لئے اجتماعی کاوشیں درکار ہیں۔ پاکستان فلسطین اور لبنان کے مہاجرین کی انسانی بنیادوں پر مدد کررہا ہے۔ دہشت گردی دونوں ملکوں کے لئے مشترکہ چیلنج ہے۔ علاوہ ازیں وزیراعظم شہباز شریف سے ایران کے وزیرخارجہ عباس عراقچی نے وزیراعظم ہاؤس میں ملاقات کی۔ ایران کے وزیرخارجہ کے طور پر پاکستان کے پہلے سرکاری دورے پر آنے والے عراقچی کا خیرمقدم کرتے ہوئے وزیراعظم نے ایران کے سپریم لیڈر آیت اللہ خامنہ ای اور صدر مسعود پیزشکیان کے لئے نیک خواہشات کا اظہار کیا۔ انہوں نے پاکستان کی ایران کے ساتھ برادرانہ تعلقات کو مزید مستحکم کرنے کے عزم کا اعادہ کیا۔ مزید برآں وزیراعظم نے اعلیٰ سطح کے تبادلوں کو برقرار رکھنے کے ساتھ ساتھ مشترکہ مفاد کے تمام شعبوں میں باہمی فائدہ مند تعاون کو بڑھانے کی خواہش کا اظہار کیا۔ ملاقات میں مشرق وسطیٰ کے خطے کی تشویشناک صورتِ حال پر تبادلہ خیال کیا گیا۔ فلسطینی عوام کی حق خودارادیت اور آزاد ریاست کے حصول کی منصفانہ جدوجہد میں پاکستان کی حمایت کا اعادہ کرتے ہوئے وزیراعظم نے فلسطینی عوام کے خلاف اسرائیل کی جاری نسل کشی مہم کی شدید مذمت کی۔
پاکستان ایران کا دہشتگردی کے چیلنجز سے مل کر نمٹنے پر اتفاق
