چینی جنرل کی آرمی چیف جنرل عاصم منیر سے ملاقات، دوطرفہ دفاعی تعاون کو بڑھانے پر تبادلہ خیال
زاویہئ نگاہ رپورٹ
چین کے سینٹرل ملٹری کمیشن کے وائس چیئرمین جنرل ژانگ یوشیا نے آرمی چیف جنرل عاصم منیر سے ون آن ون ملاقات کی، پاک فوج کے سربراہ نے باہمی اعتماد اور تعاون کی بنیاد پر زور دیا۔ پاک فوج کے شعبہ تعلقات عامہ (آئی ایس پی آر) کے مطابق عوامی جمہوریہ چین کے سینٹرل ملٹری کمیشن کے وائس چیئرمین جنرل ژانگ یوشیا نے ایک اعلیٰ سطحی وفد کے ہمراہ جنرل ہیڈ کوارٹرز (جی ایچ کیو) کا دورہ کیا۔ ترجمان پاک فوج کے مطابق جنرل ژانگ یوشیا نے آرمی چیف جنرل عاصم منیر سے ون آن ون ملاقات کی جس کے بعد وفود کی سطح پر بھی بات چیت ہوئی۔ آئی ایس پی آر کی جانب سے جاری بیان میں کہا گیا کہ ملاقاتوں میں باہمی دلچسپی کے امور، علاقائی سلامتی کی صورتِ حال، علاقائی استحکام کے لئے اقدامات اور دوطرفہ دفاعی تعاون کو بڑھانے پر تبادلہ خیال کیا گیا۔ ترجمان پاک فوج نے کہا کہ آرمی چیف جنرل عاصم منیر نے کہا کہ دونوں ممالک کے ہرموسم کے دیرینا مثالی تعلقات باہمی اعتماد اور تعاون کی بنیاد پر کھڑے ہیں جبکہ پاک چین تعلقات اور تاریخی شراکت داری وقت کی کسوٹی پر ہمیشہ پورا اترے ہیں۔ پاک فوج کے سربراہ نے بین الاقوامی اور علاقائی صورتِ حال میں پاکستان کے ساتھ مضبوطی سے کھڑے ہونے پر چینی قیادت کا شکریہ ادا کیا۔ آئی ایس پی آر نے کہا کہ وائس چیئرمین ژانگ یوشیا نے اسٹرٹیجک پارٹنرشپ کے حوالے سے پاکستان کی ثابت قدمی کو سراہا۔ انہوں نے انسداد دہشت گردی کی جاری کوششوں میں پاک فوج کے عزم اور پیشہ ورانہ مہارت کی تعریف کی اور اس پائیدار تعلقات کو مزید مضبوط بنانے کے لئے چین کے عزم کا اعادہ کیا۔ قبل ازیں، جی ایچ کیو پہنچنے پر جنرل ژانگ یوشیا نے یادگار شہدا پر پھول رکھے اور شہدا کو خراج عقیدت پیش کیا، جی ایچ کیو آمد پر ان کا پُرتپاک استقبال کیا گیا، پاک فوج کے چاق و چوبند دستے نے انہیں گارڈ آف آنر بھی پیش کیا۔ دوسری جانب چیف آف جنرل اسٹاف لیفٹیننٹ جنرل محمد اویس دستگیر اور کمانڈر پیپلز لبریشن آرمی جنرل لی کیامنگ کے درمیان پی ایل اے ہیڈکوارٹرز بیجنگ میں ملاقات ہوئی۔ ملاقات میں عالمی اور علاقائی صورتِ حال پر توجہ مرکوز رہی جبکہ دونوں ممالک کی مسلح افواج کے درمیان دوطرفہ تعاون کو وسعت دینے کے اقدامات کا جائزہ لیا گیا۔ ملاقات میں چیف آف جنرل اسٹاف لیفٹیننٹ جنرل محمد اویس نے کراچی میں حالیہ دہشتگرد حملے میں چینی جانوں کے ضیاع پر تعزیت کی اور چینی شہریوں کی پاکستان میں سیکیورٹی کو یقینی بنانے کے غیر متزلزل عزم کا اعادہ کیا۔ آئی ایس پی آر کے مطابق دونوں ممالک کے مشترکہ دشمنوں سے نمٹنے کے لئے باہمی تعاون کو مزید وسعت دینے پر اتفاق کیا گیا۔
