زاویۂ نگاہ رپورٹ
پاک بحریہ کے جہاز اصلت نے ریجنل میری ٹائم سیکیورٹی پیٹرول پر تعیناتی کے دوران مالدیپ کا دورہ کیا۔ مالے بندرگاہ پہنچنے پر مالدیپ نیشنل ڈیفنس فورس اور کوسٹ گارڈ کے حکام نے جہاز کا پُرتپاک استقبال کیا۔ بندرگاہ پر قیام کے دوران پی این ایس اصلت کے کمانڈنگ افسر نے چیف آف ڈیفنس فورس میجر جنرل ابراہیم ہلمی اور کمانڈنٹ کوسٹ گارڈ بریگیڈیئر جنرل محمد سلیم سے ملاقاتیں کیں۔ ملاقاتوں کے دوران باہمی دلچسپی کے امور پر تبادلہ خیال کیا گیا۔ کمانڈنگ افسر نے چیف آف دی نیول اسٹاف ایڈمرل نوید اشرف کی طرف سے مالدیپ کے عوام کے لئے نیک خواہشات کا اظہار کیا۔ مالدیپ میں قیام کے دوران میزبان ملک کی مسلح فواج کے سربراہ، حکومتی حکام، پاکستان کے ہائی کمشنر اور آسٹریلیا، بنگلادیش، چین، جاپان، سعودی عرب، ملائیشیا، روس، سری لنکا، برطانیہ، امریکا کے سفیروں، نمائندوں اور مقامی لوگوں نے جہاز کا دورہ کیا۔ پاک بحریہ کے جہاز ریجنل میری ٹائم سیکیورٹی پٹرول (RMSP) پر باقاعدگی سے تعینات کئے جاتے ہیں، جس کا مقصد میری ٹائم سیکیورٹی کے لئے بین الاقوامی ذمہ داریوں کو پورا کرنا، سمندروں پر نیویگیشن کی آزادی کو یقینی بنانا اور عالمی مشترکہ اثاثوں کا تحفظ کرنا ہے۔ بندرگاہ کے دورے کے اختتام پر PNS اصلت نے مالدیپ کوسٹ گارڈ کے جہاز شہید علی کے ساتھ بحری مشق کی۔ مشق کا مقصد بحری اور باہمی تعاون کو بڑھانا تھا۔ مالدیپ اور پاکستان کے درمیان دوستانہ تعلقات ہیں جو وقت کے ساتھ ساتھ مزید مضبوط ہوئے ہیں۔ PNS اصلت کا دورئہ مالدیپ دونوں ممالک کے درمیان بحری تعاون کو فروغ دینے میں اہم کردار ادا کرے گا۔
